مشكلة الشعر اللي بينمو تحت الجلد:
-طبعا كلنا بنعاني منها وبتبوظ المنظر بالاخص الرجلين والمشكلة دي بقي بتكون يااما انتي بتستخدمي وسيلة غير السويت لازالة الشعر وكمان بتهملي جسمك ومش بتشيلي الجلد الميت فالشعرة بتلف تحت الجلد ويتكون فوقفها طبقة من الجلد الميت
-طبعا في ناس بتستخدم ااسويت وبتعاني بردو من المشكلة دي وغالبا بتبقي مشعرة اكتر او هي دي طبيعة جسمها
طيب يعني بردو نحلها ازاي,اقولك ياستي:
لو بتستخدمي وسيلة غير السويت نصيحة مني بالاخص رجليكي اعمليها بالسويت انا كنت كدا ومكنتش بعرف اعمل سويت وكنت بستخدم براون لفترة وبعدين بدات الاحظ اني رجلي الشعر جدر فيها وبيطلع تحت الجلد وبقت دايما خشنة وشكلها وحش لحد مالحقت نفسي ورجعت تاني للسويت بس طبعا اخدت وقت علي ماتصلحت تاني
-قبل السويت بقي كدا زي الشطورة افتحي المية السخنة وحطي رجليكي تحتها وهاتي شاور جيل ورغي علي رجليكي وهاتي الحجر الخفاف بتاع الرجل ومشيه علي رجليكي في شكل دواير بس طبعا بشويش وفوق رغوة الشاور بحيث انه يشيل الجلد الميت ويطلع الشعرة من تحت الجلد
-بعد ماخلصتي اشطفي رجليكي كويس اوي ونشفي بردو كويس وهاتي طبق صغير فيه عسل ابيض علي عصرة ليمونة ولزقي رجليكي بس تلزيق
-هاتي السويت وظبطيها وابتدي اعملي رجليكي مع اتجاه الشعر وعكس اتجاه الشعر ده بيشيل الشعر اللي تحت الجلد
-الشعر الصغير ده اقطعي حتة صغنونة من السويت وافرديها طبقة رقيقة وبصباعك شيلي الشعر الضغير هاتلاقيه بيطلع معاكي بس هاياخد وقت شوية بس هايطلع باذن الله
-خلصتي السويت علي خير يكون جنبك ازازة الجلسرين(قبل ماتشطفي جسمك)ادهني رجليكي وهاتي المقشر الجميل بتاعك وقشري رجليكي كويس اوي واقعدي افركي لحد ماجلدك يتشرب ويبتدي يطلع كل الجلد وكمان اي شعر مكنش باين ومينفعش يتشال بالسويت هايطلع
انا بستخدم المقشر ده روعة
خلصتي خلاص قومي بقي اشطفي رجليكي كويس وادهني كريم جليسوليد مضاف ليه زيت جنين القمح واللوز الحلو وشوفي رجليكي وجمالها ونعومتها
-دي بقي خطوة من دلوعة عشان تزودي الجمال واللمعة وتبقي رجليكي زي الممثلين ،تاني يوم للسويت هاتي بودرة تشقير وحطيها علي رجليكي(جربيها الاول علي حتة صغيرة عشان لو عندك حساسية ولا حاجة)وبعدين اشطفي رجليكي لمعة ايه وبريق ايه وحتي الشعر الصغير هايتشقر وهايبقي مش باين خالص وبجد رجليكي هاتبقي زي الممثلين كدا
-وطبعا كل اسبوع لازم تعملي تقشير لرجليكي عشان تشيلي الجلد الميت وتحافظي علي جمال رجليكي
طريقة عمل باديكير روعة لقدم رجليكي عشان الشياكة تكمل:
بعد بقي ماهتعملي رجليكي بالطريقة اللي قلنا عليها هاتلاقي نفسك كدا فرحانة بنفسك وعايزة تدلعي كدا بس استني الشياكة متكملش من غير كعب رجليكي مايكون زي الحرير وكمان ضوافر رجليكي منسقة،
-هاتي طبق بلاستيك كبير وحطي فيه مية سخنة وملح وشوية شاور جل وعليهم معلقة كبيرة بيكنج بودر(بيبيض وينعم موت)وتحضري معاهم ليمونة وليفة خشنة وبقية الادوات زي الصورة
طبعا الادوات سهلة عبارة عن فرشة اسنان قديمة ومبرد في اخره باديكير زي مانتو شايفين وحجر خفاف
-انقعي رجليكي في المية وبعد حوالي ربع ساعة ابتدي ادعكي كعب رجليكي كويس اوي اوي بالحجر وبطن رجليكي ،وبطن صوابعك ووش رجليكي كمان بيبقي عليه جلد ميت بس ادعكيه بشويش عشان متتعوريش
-بالليفة الخشنة ادعكي بردو رجليكي وضوافرك وبين ضوافرك كويس اوي
-بفرشة السنان بقي عليكي وعلي ضوافر رجليكي اغسليهم وادعكيهم بيها كويس
-نشفي رجليكي وهاتي الليمونة وادعكي بيها بطن رجليكي ووش رجليكي وضوافرك وسيبيها لما تنشف وبعدين اشطفي رجليكي وهاتي المبرد وابردي ضوافرك وشيلي الجلد الميت بشويش من حواليها ونسقيها كدا وخليها شيك وبعدين ادهني كارباميد او فازلين اللي عندك
-اخر خطوة بقي قومي اوام صلي العشا وتعالي بقي هاتي المانيكير الابيض والشفاف وحطي بقي مانيكير فرنش كدا وادلعي
وقومي هاتي خلخال رقيق كدا والبسيه والبسي بنطلون برمودا ولا جيبة قصيرة واتدلعي بجمال رجليكي وفرحي جوزك بدل ماطول النهار لابسين تل هدوم واجوازتنا خلاص هاتطق ههههههههههههههههه
و(بس متنسيش بعد كدا وقبل الفجر تدعييلي دعوة حلوة وتشيلي المانيكير ياحلوة وتصلي الفجر عشان ربنا يتقبل مننا تعبنا لازواجنا ويبقي في ميزان حسناتنا)
عشان تشدي جسمك وبطنك وتشيلي السليوليت :
بصوا بقي انا مليش دعوة خالص بالناس اللي هاتقول اجيب وقت منين وتتحجج ميت حجة ،انا ليا بالناس اللي عايزة تغير جسمها وشكلها للاحسن وتبقي عندها ارادة والتزام لازم ناخد بالنا من نفسنا مش شايفين البنات اللي في التليفزين عاملين في نفسهم ايه ،ولا بلاش البنات اللي في الشوارع لابسين ازاي وجسمهم عامل ازاي وهما ماشاء الله مقصروش عرضينه كله للفرجة ولاحول ولاقوة الا بالله
المهم طبعا عشان البطن تتشد مفيش مفر انك لازم تخسي وكمان تلعبي رياضة،اي حد هايقولك حاجة تانية يبقي بيضحك عليكي
-يلا دلوقتي اللي عايزة تبدا تروح كدا زي الشطورة علي قسم الايروبكس والتمارين الرياضية تختار كام تمرين تستمر عليهم وتلتزم بيهم وبعدين تجيلي تاني بقي:
كريم تدهنيه وانتي بتعملي رياضة عشان يشد جسمك:
–هاتي علبة كريم جليسوليد كبيرة وحطي عليها معلقة كبية مليانة شبة وفنجان قهوة خل تفاح وفنجان قهوة منقوع المرة وقلبيهم وسيبيهم يوم مع بعض
-قبل كل تمرين ادهني جسمك بالكريم وهاتي كيس بلاستيك ولفيه حوالين المنطقة اللي عايزة تخسيسيها وابتدي علي بركة الله العبي التمارين او روحي الجيم وتعالي بقي خدي شاور وادهني جسمك كريم عليه زيت جنين القمح وزيت اللوز الحلو ومع الوقت هاتلاقي جلدك بيشد جامد وبتخسي وقوامك ممشوق وجميبل
كريم المضاد للسيليوليت:
ده بقي والله العظيم تحفة بجد مش بس للسيليوليت كمان بيفتح المنطقة جدا جدا وبيخليها ناعمة وجميلة وطبعا بيقلل السليوليت اللي بيبوظ شكل الجسم ويخربه وطبعا ده داومي عليه كل يوم لو انتي بتعملي دايت وبتخسي وعندك كمية كبيرة من السليةليت وهاتلاقي نتايج مبهرة باذن الله
-علبة كريم جليسوليد وعليها معلقتين بن كبار وعصير ليمونة صفرا كبيرة،وبس
ده شكله زي مانتو شايفين ادهنيه علي المكان اللي انتي عايزاه(بطنك اردافك المؤخرة رجليكي)واقعدي ادعكي فيه باديكي لحد ماتحسي انه اتشرب وبعدين افركي افركي لحد ماتشيليه كله او هاتي الليفة المغربية وادعكيه بس مش جامد اوي(بس لازم تسيبيه يتشرب الاول في كل الاحوال)واشطفي رجليكي ورطبيها وادعيلي بقي
حمام الحرير هدية من دلوعة للفتوكات الناعمين الحلويين:
الحمام ده سبحان الله هاتشوفي نعومة مش هاتصدقي نفسك واتحدي ،لازم اي واحدة تعمله تيجي تقولنا النعومة ايه رايها فيها ماشي،هو طويل شوية بس انتي ممكن تعمليه لو عندك مناسبة يعني
(جوزك جاي من السفر ،عيد جوازكم ،عيد ميلادك او ميلاده)كدا يعني ولو انتي بتحبي تهتمي بنفسك ونعومتك اوي اعمليه كل اسبوعين او 10 ايام زيي
-الاول هاتي كمية سدر مطحون تكفي جسمك وحطي عليه لبن او لبن بودرة وحطي عليه مية سخنة ،ودي صورة السدر المطحون
وحطيه بقي علي جسمك حتة حتة وانا بصراحة ساعات لو مستعجلة بعمل ايدي ورجلي بس علي اساس انهم اكتر حاجة بتبان بس بردو لو تعملي جسمك كله وبطنك والمؤخرة هايبقي احلي واحلي واقعد افرك فيه هاتلاقي بقي بدا يتفرك خالص من علي جسمك وطلع وبر كدا ولونه اسود خالص طبعا انتي اكيد عرفتي لونه اسود ليه
لانه طلع الجلد الميت والدهون المتراكمة علي الجلد
بعد كدا هاتي بقي طبق حطي فيه خل تفاح (ممكن خل عادي بس خل التفاح اروع عن تجربة)
وهاتي بقي الليفة المغربية او الليفة اللي علي شكل قفاز روعة بردو ويمكن احلي من الليفة المغربية
وادخلي الحمام وافتحي البخار كدا كويس وقفلي الحمام عشان البخار يتحبس في الحمام وهاتي الليفة بليها بالخل وادعكي بقي،واديها دعك لما تقولي يابس في كل حتة هاتلاقي جسمك بيظفلط من النضافة وبيلمع اوي
-اخر حاجة بقي طبق فيه معلقتين من المقشر بتاعك وعليهم ملح حليب وشوية زيت زيتون وماء ورد ووزعيهم علي جسمك وافركي باديكي بالراحة لمدة 3 دقايق وبعدين اشطفي جسمك كويس
وانا بقي مش هاتكلم علي اللي هاتلاقيه
ازاي تعطري جسمك بعد الحمام والريحة تفضل ماسكة فيكي:
–روحي عند الراجل بتاع تركيب العطور وهاتي منه الزيت العطري بتاع البرفان اللي انتي بتستخدميه وبتحبيه وجوزك بيحبه
-هاتي ازازة زيت جونسون للاطفال فضي منها ربعها وحطي بداله الزيت بتاع البرفان ورجيه كويس بعد الحمام الجامد ده وانتي لسة جوة والبخار موجود وجسمك مبلول نص نص ادهني جسمك بالزيت عليه البرفان
-هاتي بودرة جسم معطرة ورشي علي جسمك بعد الزيت هاتلاقي البودرة دابت كدا وجسمك امتصها وكمان شالت الزيت الزيادة والرطوبة
-اخرجي من الحمام والبسي الهدوم اللي علي كيفك بقي ورشي علي الهدوم بس مش جسمك البرفان بتاعك
وشوفي ريحتك بقي تبقي عاملة ازاي
و
واكيد بقي انا مش هاتكلم ع التقييم اللي تلاقي الموضوع يستاهل وتقدر تعبي تقييم الموضوع
ودول بقي مني ليكم يااحلي قمرات
الموضوع ده عجبني اوي وقلت لازم كل اخواتي وحبيباتي في المنتدي يقرؤه عشان ننفذوا سوا
ومتنسوش تقولولي رأيكم
بحبكم في الله
عزتي نقابي
[/align][/cell][/tabletext][/align]
استفدت كتييير من موضوعك
والله دخلتيني جو مصري الله يسعدك
موضوع رائع ويستاهل التقييم
زوتم التقيم يا جميل
هالموضووع بصراااحه محتاجين أشيااء زي كذا