الكل يسأل لجل يشبع فضوله
مامن عضيد ولا ولد خال ولا عم
ومامن صديق أمس جاني بميوله
وقت الرخا كل المخاليق تهتم
والمهتني حتى المعادين حوله
ووقت الشدايد شوفهم كلهم صم
نوحك بعالي الصوت مايسمعوا له
إن جيت اخبي حسرة القلب واكتم
أشوفها ماهي بهذي السهولة
ياكيف أغطي طاغي الهم بالهم
والدمع من يقدر يقاوم نزوله
الحزن كم نطَق من الجور ابكم
وخلا خفيفين العقل يفطنوا له
والمحجر اللي بالمدامع ملغم
من يمنعه لا فاض وفرغ حموله
قضيت ثلثين العمر بس اندم
على عشير من زمان الطفولة
واللي بقى لي من عمري اقضيه الملم
باقي حطامي من سوايا فصوله
الله يقطع ناس ماعندهم دم
خص الذي جاني يردد حلوله
ماكان ودي اشتكي بس لزم
وانا على النية سمحت بدخوله
فضفضت له وانا كسير اتألم
والدمع فوق الخد سيل سيوله
شمر عن ذراع الكذب غيب الكم
دق الصدر يستعرض احدث طبوله
قال انت تامر واللي تحتاج له تم
تلقاه عندك قبل موعد وصوله
اشر ماله داعي انك تكلم
واللي تمنيته وكاد بتنوله
حان الوعد جيته وقام يتلعثم
عرفت عذره من قبل لايقوله
الكذب له ريحه من بعيد تنشم
الله يزول الكذب الله يزوله
لو كان محتاج العطا شخص ينذم
تلقاه واصحابه الرخوم افزعوا له
ولو كانت الحاجة لشي محرم
تلقاه واصحابه الردايا سعوا له
وانا عن الحاجة لمثله مكرم
ماكنت اعرفه لين جتني فعوله
لو كان بيده الماي اشرف لي السم
من باب عزة نفس ماهي بطولة
يابنت حواء وانت ياولد آدم
من بعد موتي رددوا هالمقولة
( منت بقد الكلمة احسن لك التم
ولا تخدع بقولك عيال الحمولة)
يالله ياللي بخافي السر تعلم
ياواحد يا كل الملا يشتكوا له
فيني حزن لو ذاقه الكافر اسلم
كلما يزيد يزيد عظمي نحوله
والليل كلما غابت الشمس واظلم
أجني الخساير من ظلامه وطوله
والجرح يتجدد اذا قلت يقدم
كنه عليمن دون هالخلق يوله
والخافي اعظم بس ماهوب أعظم
من قدرتك ياللي الملا ينحنوا له
ابدا بشكواي وبدعواتي اختم
( يذوق حزني من خدعني بقوله )