نصائح بسيطةومجربة لتقليل الوزن وتثبيته 2024.

دى شوية نصائح نسيطة ومجربة بتقلل الوزن بس
واحدة واحدة او لتثبيت الوزن لو كنتى بالفعل نزلتى الوزن عن طريق ريجيم
غير انها تصلح انك تستمرى عليها على طول كنظام حياة لأنها صحية كمان

** كلى وجبات متعددة وصغيرة

** كلى بملعقة صغيرة أو شوكة ..أنا باكل كل حاجة بالشوكة ماعدا الشوربة بس ..:)

** قللى مرات الشاى اللى بتشربيها مثلا بدل مهما 4 لو بقوا 3 مش ح يحصل
حاجة وبعدين لازم نقلل كمية السكر اللى في الكوباية ..والأظرف انه بدل ما نشربه
ماسخ عن ما بنحبه نستعمل كوب فى حجم نص الكوب اللى اتعودنا نشرب فيه
ونحط نص كمية السكر…يبقى قللنا السكر للنص وشربنا الطعم زى ما بنحب

** اعملى حلويات وطواجن وفطائر وكل حاجة بس مش مرات كتير واعملى فى صينية
أصغر يعنى بكمية أصغر ..وخليكى كريمة :)مع اللى حواليكى علشان تخلص بسرعة وماتفضليش معرضة للإغراء ومضطرة تقاومى فترة طويلة يعنى وزعى على الولاد والزوج وهادى منها لو ينفع وقدمى للضيوف ل ومناسب وهكذا …
لأن كمان متعة الست أساسا فى انها تعمل وتكون النتيجة حلوة والكل يبقى مبسوط
مش انها تاكل منه كتير ..فالطريقة دى ح تدى الشعور المطلوب بأقل الخسائر

** أى وصفة نعملها نقلل فيها الدهون بس بدون إخلال بالطريقة

** البطاطس المحمرة نستبدلها ببطاطس معمولة صوابع ومتبلة وتدخل الفرن
هى مش طعم المقلية بس تغنى ..على الأقل مرات كده ومرات قليلة تبقى مقلية
من نفسنا

** اعملى الرز مسلوق ح ينزل معظم النشا اللى فيه فى ميه السلق
ويكون خفيف خالص وطبعا بزيت مش بسمن

** الفراخ بطبخها من غير جلد لأسباب صحية لأن زى ماقالوا السموم والهرمونات بتتركز فى الجلد ومش بحمرها ..بعد السلق تتحط تحت الشواية
وممكن قبلها ندهنها بحاجة بسيطة تد ى لون

** القزقزة والتسالى والحاجة الساقعة والشيبسى و ….كل ده مشكلة كبيرة جدا
لو قللنا خااااالص ح يفرق كتير..غير انه مضر صحيا

**لو قللنا من كل حاجة بناكلها معلقة و لا شوية من المشروب ولا عزمنا على حد بحتة من حاجة..
كده يعنى …كل حاجة بتوفر لنا شوية سعرات ,,حتى لو بسيطة لكن بتجمل على بعضها
عايزة وقت لكن بنخس وصحتنا ان شاء الله كويسة

** لو بتاكلى ساندويتش مثلا نص رغيف ..لأ .. خليه ربع بس وعوضى الفرق
بخضار كتير جواه يعنى ترنشات خيار..طماطم ..خس …ح تحسى انك شبعتى تمام
وبسعرات قليلة

** لما تحطى الرز على الخضار …حطى رز بسيط و خضار كتييير بس يكون برضه قليل الدهون أثناء طبيخه

** لما نجوع فى النص دايما يكون فيه حاجة جاهزة تسعفنا..خس ..خيار..جزر
وهكذا

**نستعمل اللبن والزبادى قليل الدسم ومش ح نحس بفرق

ده اللى افتكرته
وأرجو انه يفيدكم وزى ما قلتلكم انه بيخسس بالراحةوكمان صحى

لكن جمييييعا خالص تحيتى فى أول مواضيعى فى المنتدى ..:)