كيكة الكاستر والموز والشيكولاته
اللي احنا محتاجينه هو:
كيكة شوكولاتة وكاستر وموز ..وصوص شوكولاتة (اختياري…بيتحط للشكل بس مش أكتر)
نبدأ في الشغل بأة
أول حاجة هنعمل الكيكة ومقاديرها
بس أنا هقولكم المقادير في حالة لو عملتوها في صينية كبيرة...بس أنا عملت نص المقادير بس لصينية متوسطة وأعتقد الصينية المتوسطة كميتها كافية جدا
4 بيضات
2 كيس فانيليا
نصف كوب زيت
نصف كوب لبن(حليب)
1 ونص كوب دقيق
1 وربع كوب سكر
2 معلقة كبيرة بيكنج بودر
نصف كوب كاكاو
وزي ما قلتلكم انا عاملة بنص المقادير ده بس
الطريقة:
نضع البيض والسكر والفانيليا في طبق عميق ونخفقهم في البداية على سرعة منخفضة وبعدين نعلي على أعلى سرعة ونستتكر في الخفق لحد ما البيض يتنفش ويبأة لوني سمني فاتح
والصور هتوضح الكلام ده
هنا لما بيمتزجوا بنبدأ نعلي السرعة
هنا لما البيض اتنفش…(يعني حجمه اتضاعف)
بعد كده هنضيف الزيت تدريجيا
ثم نضيف اللبن تدريجيا
وبعدين ننخل الدقيق والكاكاو والبيكنج بودر ونضيفهم تدريجيا على خليط البيض
وده الشكل النهائي بعد ما خلصت خفق
وهنا بنصبها في صينية مدهونة زيت
وندخلها فرن متوسط مشغل مسبقا على درجة حرارة 180 ونسيبها لمدة نص ساعة..أو لحد ما تستوي ويبأة شكلها كده
يللا نكمل مع بعض
بعد ما نخلص الكيكة نعمل الكاسترد بالطريقة الموجودة على العلبة (يعني هنحط لتر لبن +5 معالق كسترد كبيرة ومليانة مش أربعة + سكر حسب الرغبة أنا بحط 6 معالق كبيرة ومليانة ) ونقلبهم كويس بعدين نحط الحلة اللي فيها الكستر على النار ونستمر في التقليب لحد ما يتقل…
كده إحنا خلصنا كل حاجة
نيجي بأة لخطوات الكيكة بالموز والكاسترد
هنقطع الموز شرايح ونحطه فوق الكيكة بالشكل ده
وبعدين هنصب فوقه الكاسترد اللي إحنا لسة عاملينة ونسيب الكيكة تبرد خااااااااااااااااااااااااااااااااااااااااااااااااا ااااااااااااااااااالص وبعدين نزينها بالشوكولاتة أو صوص الشوكولاتة والخطوة ده مش مهمة خااااااااااالص ..هي للشكل وبس…وبعدين نقطعها زي ما احنا عاوزين
وأنا بالنسبة علشان أخلى التقطيع سهل
حطيت الصينية اللي فيها الكيكة والموز والكاسترد في الفريزر لمدة ساعة وبعدين طلتها وقطعتها وما قدمتهاش إلا لما دفيت خااااااااااااااااااااااااااااااااااااااااااااالص
صدقوني …طعمها تحفة وهتعجبكم جدا إن شاء الله
يللا جربوها وقولولي رأيكم…آه على فكرة ممكن بدل ما تعملوا كيكة الشوكولاتة تشتروا كيكة جاهزة لو مستعجلين
وده الصورة النهائية
منقوووووله