اولاً كل عام وانتوا بخير مقدماً،، الله يبلغنا رمضان ويبلغنا ليلة القدر انشالله .. وانشالله انكوون من عتقاء النــار في نهاية الشهر الكريم ..
مــوضوعي اليوم عن طريقتي في استخدام جهاز شد عضلات الوجه والرقبه واستخدام الكولاجين للحصــول طبعاً على خدود مشدوووده ومليانه طبعاً الكولاجين الكل يحتاجه مب بس اللي سنهم كبير لانه جونا معرووف بحراارته واللي له التأثير السلبي على البشره..
قبل ما ادخل في الموضوع حبيت اشرحلكم شوي عن الكولاجين ..
الكولاجين : هو ربع البروتين اللي في اجسامنا ويشكل بنسة 75% من بشراتنا والكولاجين اساساً هو بنية أجسادنا وجلودنا ويحمي ويدعم الأنسجة اللينة. ومع تقدم العمر يقل إنتاج الكولاجين في أجسامنا. يبدأ جلدنا في التغضن ويفقد بريقه الشبابي.
فعشان جذيه يا حبذا نبتدي العنايه واحنا صغاار عشان مانتعب واحنا كباااار ..
يللا نسمي بسم الله ونبتدي جلسة شد عضلات الوجه والرقبه..
بنحتاج في هذا الكورس لبعض مستحضرات الكولاجين + جهاز شد عضلات الوجه والرقبه + ماي ورد + مره مطحونه ..
بدايتاً انظف البشره وانحضرها عشان تكون جاهزه للكورس،، نييب جهاز شد عضلات الوجه والرقبه اللي مبين فالصورتين
بتلاحظون وجود ثلاث قبب فضيه هي عباره عن نقاط تنشيط عضلات الوجه
A حق منطقة الرقبه والذقن
B حق المناطق المحيطه بالفم والخدود
C حق منطقة الجبهه والعينين ولشد ورفع الحواجب
التمرين الاول:
مثل اللي مبين فالصوره الخطين الزرق على الرقبه والذقن يعني نستخدم القبه A ونحط على الحديد شوية جل وشغلي الجهاز واختاري مستوى الطاقه المطلوبه ثبتي الجهاز على منطقة الرقبه عشان يشد الرقبه بتلاحظون بوغزات كهربائيه بسيطه حتى لاتذكر لاتخافون هذي عباره عن انقباض للعضلات، بعد ماتخلصون من تمرين الرقبه ركزوا على اللغد اللي هو ( اللحم المتدلي) تحت الذقن باللغه العاميه نسميه الغنغون، المهم ركزوا على هالمنطقه زيدوا من مستوى الطاقه شوي لانه هالمنطقه تكون عند بعض الناس متهدله شوي او ترتخي بتقدم العمر.
التمرين الثاني:
مثل اللي مبين فالصوره الخطين الزرق على الخدود والمناطق المحيطه بالفم وفي هذا التمرين نستخدم القبه B ونحط على عليها جل ونختار مستوى الطاقه المطلوبه ونركزها على اسفل الخدين والمنطقه المحيطه بالفم مثل اللي امبين بالصوره وهالتمرين يقلل من ارتخاء وتدلي الخدين.
التمرين الثالث:
ومثل مابين فالصوره الخطين الزرق اعلى الخدين اسفل الهالات اللي حولين العين، نركز القبه C اعلى الخدين اسفل الهالات وحولين العين وهذا التمرين يقلل من الخطوط حول الزاويتين الخارجيتين من العين
التمرين الرابع:
الخطين فوق الحاجب نركز القبه C على المنطقه اللي فوق الحاجب ونركز على الجبهه ..
واخيرا خلصنا من جلسة شد عضلات الوجه والرقبه.
يتبع ..