ازاى تحطى كريم الأساس

هتحتاجى معانا

1- كريم الأساس طبعا 🙂 – و انا اتكلمت عن انواع كريم الأساس فى موضوع تانى

2- اسفنجة بتاعت الكريم

الخطوات :

1- تنضفى وشك كويس قوى

2- لو هتنزلى فى الشمس يبقى تحطى واقى الشمس .. لو فى البيت و بشرتك جافة حطى اى كريم مرطب الاول و سيبيه حية البشرة تشربة و لو فيه اى زوايد شيليه بمنديل

3- حطى شوية كده من كريم الاساس فى ايديك ( مش كتيير )

4- حطى نقطة كبيرة من كريم الأساس اللى فى ايديك على الأماكن ديه ( الانف – الخد اليمين – الخد الشمال – الجبهة -العين و الجفن – الدقن و الشنب – رقبتك لو هتبان )

5 – بصوابعك الحلوة بقى ابدئ بتوزيع كريم الأساس اكنك حاطة كريم عادى بس ابدئ بالأنف الاول و بعد كده الخدين و بعد كده الجبهة و بعد كده الدقن و الشنب و الرقبة – عند عينيكى وزعى كريم الأساس بأطراف صوابعك و بالراحة جدا اوعى حد فيكم تدعك و هقولك ازاى لما اشرح ازاى تحطى الكونسيلر

6- تجيبى الاسفنجة بقى و تتأكدى من توزيع كريم الأساس تماما على وشك و كله متوزع تمام

بس كده خلصنا 🙂

استنوا الموضوع اللى جاى ازاى تحطى الكونسيلر للمبتدئين و ديه الخطوة التانية فى المكياج