كل سنه وانتوا بخير وصحه ومحققين كل اللي بتتمنوه :mood4:
الاخت (كيت كات ) كانت سألت من كام يوم على طريقة لف محشي الكرنب والخلطه بتاعته في الموضوع ده عندي سؤال؟؟؟؟؟؟؟؟؟؟؟؟؟بسرعه ساعدوني – منتدى فتكات | منتدى نسائي للمرأة فقط
فقلت انزله بالصور .. في موضوع جديد لتعم الفايده باذن الله
نبدأ .. بسم الله
لكرنبه كبيرة الحجم
4 كوب ارز – حزمتين صغيرين بقدونس – حزمتين كبار كسبره (الكسبره الخضرا هي اللي بتعطي الطعم لمحشي الكرنب فكل ما زادت كل ما كان اطعم) – حزمه كبيره شبت – بصله كبيره – معلقه ثوم مفروم كبيره – رشة بابريكا – معلقه صغيره كمون – نص معلقه بهار مشكل – 2 معلقه كبيره سمنه بلدي او زبده بلدي – معلقتين كبار زيت ذره – عصير 5 طماطم كبيره – معلقتين معجون طماطم او صلصه
تجهيز الكرنبه وسلق الورق
بيتسلق ورق الكرنب في ميه فيها فصوص ثوم ورشة كمون << اضافتهم مهمه لمية السلق
بيتسلق ورقه ورقه بعد ما تفصليه بالراحه علشان مش يتقطع ولو الكرنبه صغيره في الحجم ممكن تضعيها دقايق في الميه المغليه وطلعيها وهيكون سهل فصل الورق بدون ما يتقطع
ومجرد ما تطرى الورقه طلعيها من الميه على طول علشان مش تتهري وصفيها على المصفاه
=============
تجهيز الحشوه
تفرم البصله ويحمر جزء منها في خليط من السمنه او الزبده البلدي مع زيت ذره لحد ما تصفر
وبعدين يضاف عصير الطماطم ومعلقتين صلصه كبار وسيبيها تتسبك وتنشف من الميه
يضاف على الارز الكمون والبهارات والبابريكا .. وباقي البصله النيه والثوم المفروم
اول ما الصلصه تتسبك يضاف لها الارز ويقلب لحد ما الارز يتغلف بالسمنه والصلصه ويسخن فقط بدون ما يتحمر __ الخطوه دي بتدي طعم جميل للمحشي
ثم يضاف على الارز بالصلصه.. الكسبره والبقدونس والشبت المقطعين ويضبط الملح
وبكده الخلطه تكون جهزت الحمدلله
=============
تقطيع الورق
يقطع بالسكينه العرق السميك اللي في الورقه
وبعدين تلف الورقه اسطوانه حول بعضها وتقطع لنصفين بالعرض او لثلاثة اجزاء حسب حجم الورقه
فلما هتتفك الورقه هيطلع معاكي شرايط من ورقة الكرنب
يقطع الشريط لقطع بعرض مناسب بحيث هينتج عندك قطع صغيره مستطيله
يوضع على كل قطعه معلقه صغيره من الحشو .. وتلف الورقه عليه (لاحظي العروق اللي في الورقه اتجاهها عكس اتجاه اللف .. علشان تتلف معاكي بسهوله وتمسك على الحشو)
ويرصوا في الحله متلاصقين جنب بعض
ومش هيفك ابدا باذن الله
يسقى المحشي بمرقة فراخ .. و البط افضل (4 كوبايات او 3 ونص)
يترك على النار لحد ما تغلي المرقه وبعدين يهدي النار وتتغطي الحله وتتساب لحد ما يستوي
في الاخر خالص بعد ما يستوي المحشي:
يتعمل تقليه عباره عن
يحمر ثوم مفروم في قطعة زبده بلدي ويضاف له كسبره ناشفه ولما يصفر الثوم .. يضاف على وش حلة المحشي ويطفي النار
ويتغرف سخن
واستمتعوا بأحلى محشي كرنب
وده شكله النهائي
بالهنا والشفا
لا تسوني من صالح دعائكم .. ولا من تقييمكم للموضوع
